童言無忌一&二

昨晚終於完成最後一堂補習，來到初秋終於要和西區說再見，下星期一就返新的 full time。

就在最後一堂，偶得這兩段童言。

一）

細路默書，我除口罩飲水，細路咁多堂以嚟第一次見到我全個樣。

細路：我覺得你個樣唔靚呀。

我：（內心OS 死𡃁仔= =) 咩唔靚呀？老師不知幾靚。（讀者們原諒我～為了臉子緣故）

細路恥笑：你係唔靚。

我：我唔靚咁邊個靚呀？Auntie 靚啲？

細路：我覺得 Auntie 都唔靚。

我：咁邊個靚呀？

細路：我覺得個個女人都唔靚。（一頓）我唔鍾意女人㗎。

我恍然大悟，眼神重現光彩：哦⋯⋯原來係咁。

XDXDXD

二）

臨走前，我同兩兄弟講再見，同佢哋講我會記住佢哋，問佢地可唔可以都一樣。

我：你哋會唔會記住我架？

大哥：老師⋯⋯

我：？

大哥：你叫咩名啊？

我：？

我：？？（內心OS：喂大佬，最後一堂啦喎XD ）

我：細佬，我叫咩名？

細佬：Ming 老師吖嘛！

嗯，我走都走得安樂啲⋯⋯XD

.

我會記得大哥彈琴好好聽好有天份，每次上堂我都偷偷 enjoy；

我會記得細佬好嗲好痴人，成日細細聲同我講佢聽日學校有咩玩，萬聖節要著咩特別服裝，帶咩玩具；

我會記得二哥好有創意，睇書果陣永遠幫到角色諗到新解決方法。

無影相，但我留低咗啲嘢。