偶得一場

這兩天翻看早陣子的寫作練習，偶得這一場。

-

時間：歷史迴廊，走到過去

地點：俊的心裡，意識裡，一個只有俊的空間，空山，未知，一個常人看不見但又存在的想像空間

人物：俊

俊：喂！

俊：你喺邊度啊？

俊：我問，你喺邊度啊？

俊：我喺呢度啊！

俊：我等咗你好耐啊。

俊：係啊，一個人啊。

俊：點解一個人？

俊：人一出世就係一個人㗎啦。

俊：你嚟咗，我哋，有兩個人，你走咗，咪得返一個人囉。

俊：我鍾唔鍾意一個人？

俊：咁要問返你又鍾唔鍾意一個人？

俊：我本來都好鍾意一個人，直到我好鍾意一個人，我就唔再鍾意一個人。

俊：喂，你做乜又走咗去呀？

俊：我等緊你㗎嘛。

俊：唔係呀，你返轉頭先啦，我喺呢個方向，你行去果個方向，我地就唔係同一個方向，我地會越嚟越遠。

俊：咩叫越嚟越遠？就係好似我地依家咁（指著自己再指著觀眾，靜默）

（靜默良久，俊似是在傾聽女人說話）

俊：（歇斯底里）喂！你返嚟啊！

-

一場看似只有一個人的自言自語，自問自答，其實又不然。不是甚麼搬得上大場面的貨色，但我喜歡還願意做實驗的自己。（所以分享）

這一場戲，我真的好喜歡這一場戲。